Gilles SIMEONI, Presidente di u Cunsigliu esecutivu di Corsica
è Marie-Antoinette MAUPERTUIS, Presidente di l’Assemblea di Corsica
anu rimessu u Premiu ANDRIA FAZI à i laureati di u 2025.

Stu premiu ricumpensa oramai ogni annu i candidati chì anu ottenutu e note e più alte à a prova scritta di lingua corsa à u Bascigliè di a sezzione “Lingua, literatura è cultura straniera o regiunale LLCER - Lingua corsa” è quelli chì anu ottenutu e note e più alte à a prova scritta di "Storia è geugrafia" prisentata in lingua corsa à u Brevettu (sezzione bislingue), tenendu contu di a scrittura di u corsu.

 

Dipoi u 1990, a Cullettività di Corsica urganizeghja ogni annu
u Premiu ANDRIA FAZI

Dopu à a scumparsa, di settembre di u 1989, d’Andria Fazi, Cunsiglieru naziunalistu à l’Assemblea di Corsica, u Duttore Jean-Paul de Rocca Serra, tandu Presidente di l’Assemblea di Corsica, decise di rendelu un umagiu cù a creazione di un premiu, da perpetuà a so azzione.

À l’iniziu, stu premiu ricumpensa ogni annu u o i candidati chì anu ottenutu a nota a più alta à a prova scritta di lingua corsa à u Bascigliè in ogni sezzione : « literaria », « scentifica », « scenze » è « tecnulugie di u management è di gestione » è u o i candidati chì anu ottenutu a nota a più alta à a prova scritta di "storia è geugrafia" prisentata in lingua corsa à u Diplomu naziunale di u Brevettu (sezzione bislingue).

In lu so discorsu di u 12 d’ottobre di u 1989, prupunendu a creazione di u Premiu, u Presidente Jean-Paul de Rocca Serra cunsacreghja l’omu « Elementu d’equilibriu indispensevule, luttendu contru à a perdita di cultura è l’alterazione di a Corsica autentica ».

À a so creazione in u 1990, u premiu “Andria Fazi” era una dutazione di fondi permettendu à a Regione d’offre à u laureatu un viaghju secondu a so scelta. Poi fù una suvvenzione, versata in parte à u laureatu, l’altra parte ghjuvenduli à cumprà un ogettu o un’opera d’Arte rilativa à a Corsica.

In u 2003, a Cullettività territuriale di Corsica decise di dutà u premiu di un muntante di 5400 €, versatu in tutalità à i laureati, à a so libera dispusizione. S’è dui o unepochi di candidati anu listessa nota in listessa catéguria, u premiu ùn hè più spartutu trà i candidati ma versatu in tuttu à u laureatu chì hà ottenutu a migliò media à u cuntrollu cuntinuu in corsu durante l’annata sculare.

In u 2022, dopu à a riforma di u Bascigliè intervenuta in u quatru di a riforma detta Blanquer, a Cullettività di Corsica adatta u rigulamentu di u Premiu. Dunque, fù prupostu d’ attribuì un premiu solu à i sculari chì anu ottenutu una nota à una prova scritta per cunservà un valore qualitativu superiore di u Premiu Andria Fazi è ricumpensà l’impegnu di i sculari chì anu sceltu di tene ‘ssa disciplina sin’à a Terminale. Dunque, si ricumpensa solu a nota d’Insignamentu di Specialità (EDS) di Terminale di a filiera "Lingua, Literatura è Cultura straniera o regiunale" (LLCER).
In quantu à u Diplomu Naziunale di u Brevettu, u premiu ricumpensa i candidati chì anu ottenutu e 3 note e più alte à a prova scritta di "Storia è geugrafia" in lingua corsa (sezzione bislingue) di u DNB di i cullegi.

Quist’annu, u premiu hè dutatu di un muntante di 3000 € chì ricumpensa a prova di u Bascigliè à ognunu di i candidati chì anu ottenutu 20/20, è di dutazione di 1500 € è di 1000 € pè i zitelli ch'anu scrittu u corsu di a più bella manera à a prova di u DNB di i cullegi.

Al di là di u prestigiu cunferitu da a so attribuzione, grazia à u so carrateru valurizante è à u livellu di difficultà di a prova u Premiu Andria Fazi cuntribuisce à dà un impulsu versu l’eccellenza.
Risponde d’incantu à a filusufia chì hà purtatu a so creazione è dinù à a vulintà di u Cunsigliu esecutivu di Corsica di fanne un puntu forte di a pulitica linguistica di a Cullettività di Corsica.

 

I Laureati di u Premiu Andria Fazi 2025

SEZZIONE BASCIGLIÈ, prova scritta di specialità di a filiera "LLCER"
Premiu d’Oru :       

• RISTORI Chjara-Maria, Liceu di a Balagna 
• DESANTI Natale, Liceu Laetitia Bonaparte 
• MORTINI Hannah, Liceu di a Balagna 
• PETRIGNANI Elena, Liceu di a Balagna 
• PAOLI Francesca, Liceu Giocante de Casabianca 

SEZZIONE DIPLOMU NAZIUNALE DI U BREVETTU, prova scritta di Storia è geugrafia" in lingua corsa
Premiu d’Oru :                                                                                                              

• LECA Lesia, Cullegiu Fesch
• ANDREI Marine, Cullegiu Laetitia

Premiu :        

• FILIPPI Andria, Cullegiu Orabona                                                                               
• ANDARELLI Inès, Cullegiu Fesch
• NUNZI Louise,Cullegiu Laetitia
• GAUDRY SPANO Ana, Cullegiu Fesch
• ARRIGHI Marien, Cullegiu Fesch 

 
 

Telecaricate u cartulare di candidatura quì sottu:

V’impegnate per a lingua corsa?
Site un associu, un’istituzione, una cullettività, una persona murale o un’intrapresa ?
Vulete prupone un’attività in lingua corsa à i zitelli di u vostru territoriu ?

A Cullettività di Corsica vi sustene è accumpagna i vostri prugetti à prò di i zitelli in lingua corsa.
 
Rispundite à a chjama à prugetti per a « Festa zitellina di a lingua corsa », nanzu à u 19 di maghju di u 2025
solu o cun parechji partenarii.
  
Impegnate vi !
 
IMPURTANTE:
Per una efficenza più bona è un trattamentu più rapidu di u vostru cartulare, vi preghemu di rispettà u regulamentu di l’aiuti.
Ùn seranu micca ritenuti i cartulari incumpletti nè quelli rimessi dopu à a data limita (u 19 di maghju di u 2025).
 

Telecaricate u cartulare di risposta

Telecaricate l’affissu di a FESTA ZITELLINA DI A LINGUA di u 2025