Petru Ghionga Cunsiglieru esecutivu in cariga di a lingua corsa
Petru Ghionga, Cunsiglieru esecutivu in cariga di a lingua corsa hà lanciatu cù a Direzzione di a Lingua Corsa è u Cumitatu di rigiru di u Cunsigliu di a lingua corsa una seria di 7 reunione di cuncertazione cù l'attori di a nostra sucietà in vista di l'elaburazione di u Pianu Lingua 2020.
E cumune, l'intercumunalità i stabilimenti publichi di Cismonte è di Pumonte, i media, l'attori ecunomichi, prumutori di nove tennulugie, attori di l'educazione, di l'insignamentu superiore è l'ESPE, sò tanti i partenarii à esse stati invitati à participà à ste stonde di cuncertazione è di scambiu.
Dopu fattu un bilanciu di u Pianu 2007-1013, u pianu Lingua 2020 hè prisentatu cù un invitu fattu à i participanti d'arrichisce lu per e so pruposte. L'Assemblea di Corsica vuterà u pianu Lingua 2020 : Pianificazione per a nurmalisazione di a lingua corsa è u prugressu versu una sucetà bislingua durante l'ultima seduta di l'annata u 17 è u 18 di dicembre 2014.
A custruzzione d'un cunsensu è d'una visione cumuna scumpartuta, non solu da i pulitichi ma di più da l'attori suciali è i citatini, hè di primura à a bona realisazione di l'opere previste da a pianificazione. Per ch'elli possinu realizà si è per esse veramente compii, l'ogettivi devenu esse discutati è fissati in cumunu, trà tutti l'attori. Eccu u scopu di e reunione di cuncertazione.
Al di là di u 2020, u 2030 hè l'orizonte à mezu andà nantu à u quale assigneremu u capu di l'assestu linguisticu. Attacchemu avà, à fissà stu puntu è demu ci, inseme, un quadru d'assestu è di sviluppu linguisticu.
