Direzzione di a lingua corsa










Un mondu scemu per Linguimondi !

U 24 è u 25 di sittembre 2011, s’hè tenutu u primu festivale Linguimondi in Bastia per i dece anni di a ghjurnata eurupea di e lingue.
Fù una riescita, al di là di ciò chè a Direzzione di a lingua corsa pudia sperà, per a qualità di l’invitati è a diversità di a prugrammazione, per u numeru di zitelli è di maiò chì anu participatu à sta festa è à sti scontri !



U publicu di a cunfarenza di u sabbatu matina
U publicu di a cunfarenza di u sabbatu matina
- Cunfarenze di l’universitarii Alanu Di Meglio, Pasquale Ottavi è Marinette Matthey  à destinazione di i prufessori nant’à i benefizii di u bi/plurilinguisimu u sabbatu
- Cunfarenze cù attori di a rivitalisazione, di a nurmalisazione è di l’elaburazione linguistica a dumenica cù Aurelia Arkotxa, a vice presidente d’Euskaltzaindia (l’Accademia reale di a lingua basca), Yvonne Griley a Direttrice di a pulitica linguistica in Catalogna, Rumanu Colonna un dutturante di l’Università di corsica è Petru Ghionga, u cunsigliere esecutivu in carica di a lingua corsa.
- Ghjustra di scacchi cù più di centu zitelli è ghjuvanotti
- Una vintina d’associi, d’editori è d’istituzione
- Visita in lingua corsa di u museu di Bastia per più di cinquanta persone
- Stonda puetica cù scrivani di prima trica à a citadella
- Stonda di festa u sabbatu sera à u Mercà cù i canterini di l’Abbrivu , Zamballarana è i Baschi di u gruppu Kriolinak.

Dopu a presentazione di u fogliu di strada di lugliu scorsu, s’apre una via nova, u tempu di u « cumu », u tempu di u pussibile.

Ringraziemu à Roland Frias, Delphine Ramos è Véronique Bascoul per u so impegnu.

L’appuntamentu hè datu à tutti in u 2012 è per l’altre festività previste.