Cuncertu : Voce Ventu
Jeudi 7 Avril - 18H30
CCU Spaziu Natale Luciani - Corte

Voce Ventu nasce in 1995 incù una storia d’amicizia. Spiratu da a leva di u Riacquistu, issu gruppu hè arradicatu à a so cultura è à e so tradizione. U cantu ripresenta per ellu un modu di spressione, sprimendu parechji sughjetti oghjinchi o passati. Ritruvemu cusì canzone à nantu à a Storia, l’Identità, l’Amore, l’Arridichera à a so terra… Tematiche ch’ellu port’in u mondu sanu, per via di cuncerti in Corsica è in altrò : Germania, Giappone, Spagna è tant’altri paesi. « Cum’è u ventu ch’in e fronde s’invita », e voce di i cantadori è i strumenti di i sunadori ci facenu tremà i nostri sintimi i più prufondi. Voce Ventu ci prisenta una musica, arrimbata à a tradizione, chì ci riscalda u core cù culori luminosi è calurosi. Si ghjovanu di pulifunia da traspurtà ci à tempu à u prisente è à tempu à l’epica di Paoli, incù sunurità chì ci parenu paspevule. È cum’è « ci serà sempre un cantu », ci prupunenu avà un novu dischettu « À u ritimu di e sperenze » da scopre à u spaziu universitariu Natale Luciani !